Raporti i FH: Gazetarët kosovarë kërkojmë më shumë liri

Nëpërmjet një komunikate, Asociacioni i Gazetarëve të Kosovës shpreh shqetësim lidhur me konstatimet e evidentuara në raportin vjetor të Freedom House

Raporti i fundit i të Organizatës Freedom House se mediet në Kosovë janë pjesërisht të lira, ka nxitur reagimin e Asociacionit të Gazetarëve të Kosovës, të cilët kërkojnë më shumë liri për mediet. Nëpërmjet një komunikate AGK shpreh shqetësim lidhur me konstatimet e evidentuara në raportin vjetor të organizatës Freedom House.

Rastet e evidentuara në këtë raport, sipas AGK-së, paraqesin shqetësim për lirinë e shtypit në vend.

“Bazuar në të dhënat e prezantuara, Asociacioni i Gazetarëve kundërshton çdo lloj presioni mbi medien e pavarur, e veçanërisht mbi transmetuesin publik, përderisa shpreh bindjen se ndërhyrja politike në punën e gazetarëve dhe cenimi i fjalës së lirë është kundër interesave shoqërore”, thuhet në reagimin e gazetarëve kosovarë.

Fakti i prezantuar në raportin e Freedom House se dhuna ndaj gazetarëve është pakësuar, sipas AGK-së, është inkurajues, por “mbetet ende shumë punë për t`u bërë për krijimin e kushteve të favorshme për ushtrimin e lirë të profesionit të gazetarisë”.

Asociacioni i Gazetarëve të Kosovës mbetet e përkushtuar në mbrojtjen e të drejtave dhe lirive të gazetarëve dhe iu bën thirrje gazetarëve që të vazhdojnë ta ngrenë zërin për problemet që hasin gjatë punës së tyre, për krijimin e një mjedisi të sigurt për punë sa më profesionale.

Ndryshe në raportin e fundit të FH sa u përket mediave të pavarura, kjo organizata e vlerëson Kosovën me notën 5.75 pikë. Pika 1 tregon nivelin më të lartë të demokracisë ndërsa pika 7 është niveli më i ulët. Prandaj nota 5.75 tregon se Kosova sa i përket medieve qëndron relativisht keq.