Disa të akuzuar për raportin e Martyt

Dhjetë deri në njëzet pjesëtarë të UÇK-së pritet që të jenë të akuzuar në tri akuza që do të ngritën menjëherë pasi që të jetë funksionalizuar Gjykata Speciale për krime lufte

Kryeprokurori amerikan, Clint Williamson është në përfundim të hetimeve nga pretendimet e raportit të Dik Martyt, dhe sipas burimeve kosovare, ai nuk gjetur ndonjë rast se në Kosovë ka pasur trafikim organesh gjatë luftës së fundit. Megjithatë rreth 20 eprorë të UÇK-së mund të përballën me gjykatën speciale për krime lufte.

Siç raportojnë mediet në Prishtinë, disa eprorë dhe ushtarë të UÇK-së nga zona e Drenicës dhe Dukagjinit, që kanë operuar në Rahovec do të përballen prej janarit të vitit të ardhshëm me disa akuza që do të ngritën nga Task Forca Speciale e Hetimeve dhe që do të trajtohen nga Gjykata Speciale për Krime Lufte.

Këto raste nuk kanë të bënë me trafikim organesh, pasi që, Willimasen ka vërtetuar se nuk ka pasur trafikim organesh, ashtu siç ka pretenduar në raportin e tij senatori zviceran, Dick Marty. Megjithatë, gjatë hetimeve, janë gjetur prova për disa krime të kryera nga ish pjesëtarët e kësaj guerile menjëherë pas përfundimit të bombardimeve të NATO-së.

Dhjetë deri në njëzet pjesëtarë të UÇK-së pritet që të jenë të akuzuar në tri akuza që do të ngritën menjëherë pasi që të jetë funksionalizuar Gjykata Speciale

Hetimet, siç raporton Tribuna, ndërkaq kanë rezultuar se nuk ka prova për të dëshmuar dyshimin më të rëndë që kishte bërë në një raport për Këshillin e Evropës dhe kësisoj do të hidhet poshtë “drama e shtëpisë së verdhë” që ka ndjekur për vite të tëra imazhin e Kosovës dhe luftës çlirimtare.