Nesër shkatërrohen 700 armë të vogla

Policia e Kosovës do t’i shkatërrojë mbi 700 copë të armëve të vogla dhe të lehta, që u janë konfiskuar në mënyrë të paligjshme qytetarëve të Kosovës

Me rastin e Ditës Ndërkombëtare të Shkatërrimit të armëve, nesër më 9 korrik, Policia e Kosovës do t’i shkatërrojë mbi 700 copë të armëve të vogla dhe të lehta, që u janë konfiskuar në mënyrë të paligjshme qytetarëve të Kosovës. Shkatërrimi i këtyre armeve do të bëhet nëpërmjet një ceremoni zyrtare.

Sipas një njoftimi lëshuar nga Ministra e Punëve të Brendshme, në këtë ceremoni do të marr pjesë edhe ministri në detyrë i Punëve të Brendshme, Bajram Rexhepi, këshilltari i qeverisjes në UNDP, Richard Lundgren, përfaqësuesi i Zyrës Ndërlidhëse të BE-së në Kosovë dhe zëvendësdrejtori i Përgjithshëm i Policisë së Kosovës, Naim Rexha.

Kjo ngjarje organizohet me mbështetjen e Bashkimit Evropian dhe Programit të Kombeve të Bashkuara (UNDP)/SEESAC.

Ndryshe lufta e fundit që u zhvillua në Kosovë gjatë vitit 1998-1999, pas vetës ka lënë më shumë se 300 mijë armë në duar të qytetarëve. Këto armë, përkundër shumë apeleve, kurrë nuk iu dorëzuan autoriteteve të rendit.

UNDP disa herë bëri fushatë për mbledhjen e këtyre armëve, por më shumë i kushtoi fushata se sa armët që u dorëzuan.