Policia e Kosovës intervenon në dasmat ku përdoren armët e zjarrit

Foto ilustrim

Policia e Kosovës në dy raste ka sekuestruar armë të zjarri, të cilat, sipas policisë, janë përdorur nga persona të dyshuar gjatë një ahengu familjar, duke kryer veprën penale ‘shkaktim i rrezikut të përgjithshëm’, përcjell albinfo.ch.

“Në rastin e parë në komunën e Suharekës, në fshatin Studenqan pas intervenimit policor për shkak të shkaktimit të rrezikshëm nga përdorimi i armëve të zjarrit në ahengje familjare, policia ka arritur të sekuestrojë dy armë zjarri. Arma e sekuestruar është e tipit kallashnikov AK47 dhe një karikator i zbrazur. Në rastin e dytë Policia ka sekuestruar një revolver të tipit “Colt” dhe 10 gëzhoja të mbetura në vendin e ngjarjes”, ka njoftuar PK përmes një komunikate.

Në vendin e ngjarjes kanë dalë Njësia e Krimteknikës, të cilët kanë sekuestruar armët e dyshimta.

PK ka njoftuar po ashtu se në lidhje me këtë rast, është informuar prokurori kujdestar i Shtetit dhe rastet do të shkojnë në procedurë të rregullt hetimore.

“Policia e Kosovës apelon përsëri që përdorimi i armëve të zjarrit në ahengje familjare përveç shkaktimit të rrezikshëm, përbën edhe vepër penale me pasoja, andaj kërkojmë që të “festohet me zemër e jo me armë”, me qëllim që gëzimi të mos shndërrohet në hidhërim”, është apeli i Policisë.