Mërgimtari i meremeton shtëpinë invalidit

Idriz Ramadani thotë se e ka vizituar dhe ka ndihmuar shpesh familjen e Lumni Kadriut, por që tani kishte vendosur që t’ia meremetojë dhe mobilojë shtëpinë

Diaspora shqiptare  gjithmonë u është gjendur nevojtarëve në Kosovë e gjetiu. Solidarizimin e një mërgimtari e ka ndjerë së fundi edhe Lumni Kadriu , nga Kopiliqi i Epërm i Skenderajt, invalid i rëndë (pa dy këmbët). Ai është bërë me shtëpi të meremetuar, të rregulluar dhe të mobiluar mirë, falë një bashkatdhetari nga komuna e Vitisë.

Idriz Ramadani nga Vitia, me qëndrim në Austri dhe vëllezërit e tij, kanë përuruar të premten shtëpinë e Lumniut, në prani edhe të Ismet Salihut, kryesues i KK të Skenderajt, i cili fillimisht i priti ata në zyrën e tij, shkruan gazeta Zëri.

Salihu ka falënderuar Ramadanin për ndihmën e madhe që i ka dhënë familjes së Lumni Kadriut, e pastaj theksoi se nevojat dhe kërkesat për strehim janë akoma të mëdha, por mundësit e komunës janë të vogla.

“Ju keni bërë një vepër të madhe humanitare dhe unë në emër edhe të Lumniut, por edhe qytetarëve të Skenderajt u shpreh mirënjohje dhe falënderim”, tha Salihu.

Ndërkaq Idriz Ramadani, i cili ka investuar në meremetimin e shtëpisë së Lumniut, tha se e ka vizituar dhe ka ndihmuar shpesh këtë familje, por që tani kishte vendosur që t’ia meremetojë dhe mobilojë shtëpinë, e cila siç tha ai, “e kishte vetëm skeletin”.