Mërgimtarët e mbushin arkën e Komunës së Gjilanit

Autoritetet komunale të Gjilanit janë shprehur të kënaqur me pagesat që po bëjnë mërgimtarët gjatë qëndrimit të tyre në vendlindje.

“Mërgimtarët pos që paguajnë tatimin në pronë, ata kryejnë edhe pagesa të tjera që lidhen me taksat komunale dhe çështje të tjera pronësore, e që përfituese në këtë rast është vetë komuna”, thotë Feriz Bajrami, përgjegjës i tatimit në pronë në Komunën e Gjilanit.

Siç raporton rajonipress, korriku dhe gushti janë muajt e “frytshëm” si rezultat i pagesës që bëjnë mërgimtarët.
“Kemi pasur raste ku vetëm për një ditë kemi pasur pagesa deri në 29 mijë euro. Ka rritje dhe shtim të buxhetit krahasuar me vitin e kaluar sa i përket pagesës së tatimit në pronë”, tha Bajrami.

Nëse krahasohet periudha korrik- gusht 2013 me këtë vit del se për një muaj e gjysmë në vitin 2014 janë mbledhur 286 mijë e 712 euro, derisa e njëjta periudhë e vitit 2013 ka pasur një pagesë prej 246 mijë e 983 euro, e që del se në vitin 2014 ka pasur një pagesë më të lartë për 39 728 euro.