Një i vrarë e dy të plagosur në veriun e Kosovës

Një person është vrarë dhe dy të tjerë janë plagosur me armë zjarri në zonën malore Kollovert të fshatit Koshtovë, në Mitrovicë.

Policia e Kosovës njofton se i vrari është një 17-vjeçar, kurse të plagosur janë dy vëllezërit e tij, 19 dhe 15 vjeç.

Zëdhënësi i Policisë së Kosovës, Brahim Sadriu, i ka thënë Radios Evropa e Lirë se viktimat kishin qenë duke prerë dru në Kollovert, kur janë sulmuar me armë zjarri.

Në kohën e incidentit policia njofton se që të tre ndodheshin në traktorin e tyre,  me rimorkio të mbushur me sasi drunore, ndërsa rrethanat e incidentit mbeten të sqarohen pasi të sigurohen deklaratat e të plagosurve.

Autoritetet e rendit njoftojnë se në vendin e ngjarjes janë identifikuar 14 gëzhoja, të kalibrit të papërcaktuar, e që dyshohet se janë shkrepur gjatë këtij incidenti.
Autorët dhe motivet e këtij sulmi nuk dihen.

Incidenti i të premtes pasoi incidentet e një dite më parë në zonën kufitare ndërmjet Kosovës dhe Serbisë në veri të Prishtinës, ku një oficer i xhandarmërisë serbe u vra, ndërsa një shqiptar u plagos dhe një tjetër vazhdon të llogaritet i zhdukur.

Policia serbe tha se grupe shqiptarësh që po prisnin dru në pjesën serbe të kufirit qëlluan mbi xhandarmërinë, duke plagosur rëndë një pjesëtar të saj, i cili më vonë vdiq nga plagët e marra. Policia e Kosovës ende është në pritje të informacioneve zyrtare.

Ministria serbe e Punëve të Brendshme tha se ka dërguar njësi shtesë në kufirin më Kosovën.

Vija kufitare ndërmjet të dyja vendeve vazhdon të jetë e pashënuar që nga lufta e vitit 1999, e cila mori fund me ndërhyrjen e NATO-s.

Serbia vazhdon të kundërshtojë pavarësinë e Kosovës që u shpall në shkurt të vitit 2008, ndërsa është përfshirë në bisedime për normalizimin e marrëdhënieve me Kosovën në përpjekje për t’u afruar me Bashkimin Evropian.

Ajo hapi bisedimet për anëtarësim pas marrëveshjeve me Kosovën, e cila pret që gjatë muajve të ardhshëm të nënshkruajë marrëveshjen e stabilizim asocimit me Bashkimin Evropian.