Gjatë verës, 760 mijë kosovarë vizituan Shqipërinë

Drejtoria Rajonale e Kufirit dhe Migracionit në Kukës, raporton se gjatë verës pikëkalimin e Morinës e kanë kaluar rreth 760 mijë kosovarë

Bregdeti shqiptar vazhdon të mbetet destinacioni kryesor për pushuesit nga Kosova. Edhe këtë vit, sipas statistikave, shumica e kosovarëve kanë pushuar në Shqipëri, ndërsa shifrat tregojnë se deri në javën e fundit, në pikëkalimin Vërmicë –Morinë, kanë kaluar rreth 760 mijë kosovarë.

Këto shifra i ka publikuar Drejtoria Rajonale e Kufirit dhe Migracionit në Kukës, e cila ka mbikëqyrur hyrjet dhe daljet nga pika e kalimit kufitar Morinë, që është arteria kryesore   që lidhë Kosovën me Shqipërinë.

Gjatë sezonit turistik të këtij viti (qershor, korrik, gusht), sipas statistikave të Policisë Kufitare kanë hyrë nga Kosova në Shqipëri rreth 760 mijë shtetas me rreth 222.360 automjete, raporton “koha.net”.

Kosovarët kanë zgjedhur Shqipërinë për shkak të afërsisë, por edhe çmimeve më të lira krahasuar me vendet tjera.

Megjithatë bregdeti shqiptar për çdo vit po zhvillohet, duke u kthyer në një nga vendet më të preferuara për t’u vizituar. Gazeta më me ndikim në Shtetet e Bashkuara të Amerikës “New York Times” e ka radhitur Shqipërinë si vendin e katërtë për të vizituar gjatë vitit 2014.

Në këtë renditje përfshihen 42 shtete më të bukura të botës, ndërsa Shqipëria me dy kulturat e saj, antike dhe perëndimore konsiderohet si perla e Ballkanit.