Kosova i vë sanksione Rusisë

Kryeministri Hashim Thaçi tha se vendimi për vendosjen e sanksioneve Rusisë është bërë në koordinim me partnerët e shtetit të Kosovës, BE-në dhe SHBA-të

Qeveria e Republikës së Kosovës në mbledhjet e sotme, aprovoi vendimi për vendosjen e sanksioneve ekonomike për Federatën Ruse. Vendimi, siç tha kryeministri Hashim Thaçi, është në koordinimin e plotë me partnerët e shtetit të Kosovës, Bashkimin Evropian dhe Shtetet e Bashkuara të Amerikës.

“Qeveria e Republikës së Kosovës vlerëson se vendimi është në dobi të ruajtjes së rendit ndërkombëtarë dhe është përpjekje për të dënuar shkeljen e sovranitetit të një shteti të pavarur, dhe agresionin e Federatës Ruse ndaj Ukrainës”, thuhet në deklaratën e kryeministrit në detyrë, Hashim Thaçi.

Ky vendim, siç tha kryeministri në detyrë dëshmon se Kosova po trajtohet me dinjitet, dhe në mënyrë të barabartë, në marrëdhëniet ndërkombëtare.

Vendimi siç u tha në mbledhjen e Qeverisë, parasheh një listë të institucioneve të ndryshme që duhet të jenë zbatuese të vendimit për sanksione.

“Qeveria e Republikës së Kosovës, mbështet sanksionet e institucioneve të Bashkimit Evropian dhe të Shteteve të Bashkuara të Amerikës ndaj autoriteteve të Federatës Ruse. Sanksionet do të jenë në fuqi deri në një vendim tjetër, varësisht nga rrethanat që mund të krijohen”, ka deklaruar kryeministri Hashim Thaçi.