Çarshia e Vjetër të jetë brendi i Maqedonisë

Grupet e bizneseve kërkojnë që Çarshia e Vjetër e Shkupit të bëhet brend i Maqedonisë. Sipas tyre, kjo çarshi duhet të zgjojë më shumë interesim për turistë

Çarshia e vjetër e Shkupit vazhdon të mbetet pjesa më e bukur dhe më e frekuentuar e kryeqytetit maqedonas, në të cilën ruhet kultura e vjetër tradicionale e shqiptarëve dhe popujve tjerë ballkanik. Prandaj që kjo pjesë të mos harrohet, afaristët kërkojnë të bëhet si “brendi i Maqedonisë”.

Sipas biznesmenëve, Çarshia e Vjetër nuk guxon të mbetet sfidë lokale, vend i cili periodikisht do ta zgjojë interesin e qytetarëve dhe turistëve. Nga Çarshia, siç thuhet, duhet të bëhet hallkë rajonale për ofertën botërore.

Kështu të paktën kanë porositur anëtarët e Odës ekonomike të Maqedonisë dhe Bullgarisë dhe Odës Ekonomike të Maqedonisë Veriperëndimore.

Në Çarshi, theksuan, duhet të kthehen bizneset e vjetra familjare të cilët kanë qenë traditë dhe e kanë bërë të njohur përmes promovimit intensiv të vlerave ekonomike.

“Nuk duhet të jemi të kënaqur që pas aq viteve stagnim, kthehet jeta në Çarshinë e Shkupit. Përkundrazi, zejtarët sërish të bëhen pjesë e ofertës turistike”, theksoi kryetari i Odës ekonomike të Maqedonisë dhe Bullgarisë, Zore Temellkovski, citon “Koha”.

Secili në Çarshi, shtoi ai, duhet të flasë në gjuhën e tij, ndërsa bashkërisht të kuptohemi përmes kulturës. Çarshisë i duhen rrugë të pikturimit, vend për tradita, por edhe për modën e lartë, rrugica të qebapëve, por edhe të kuzhinës së shumëllojshme orientale.

Sipas drejtorit ekzekutiv të Odës Ekonomike të Maqedonisë Veriperëndimore, Arben Halili, Çarshia jo vetëm që është çarshia më e madhe në Ballkan, por udhëheq edhe për nga vlerat kulturore e tradicionale.

“Për këtë arsye jemi të interesuar që të ringjallet në nivelin adekuat, të mbështeten para se gjithash bizneset familjare të cilat kanë qenë traditë e saj, Por, këtu kontribut duhet të japë edhe shteti, të përmirësohet infrastruktura, të përshpejtohet ndërtimi i Korridorit 8 dhe rruga Shkup-Prishtinë që do të mundësojë zhvillim të biznesit dhe gjithsesi të numrit më të madh të turistëve”, deklaroi Halili.

Në takimin e përfaqësuesve të biznesit ishte një ide që nga viti i ardhshëm, të bëhet program njëmujor ose dymujor që do të promovohet përmes afisheve në aeroporte ose vendkalimet kufitare për turistët që të njoftohen me aktivitetet dhe me Çarshinë e Vjetër të Shkupit.

Ata e paralajmëruan edhe manifestimin “Çarshia dhe miqtë” që do të mbahet të shtunën më 20 shtator, në më shumë lokacione në Çarshinë e Vjetër të Shkupit.

Performanca kulturore, biznes takime, kontakte joformale, kontakte dhe shoqërime janë pjesë e programit të manifestimit.

Biznesmenët kanë mbështetje të plotë nga Komuna e Çairit sepse, sipas kryetarit të komunës Izet Mexhiti, edhe pse ndoshta Çarshia ka lëvizur, ende mungojnë aktivitete të cilat do ta kthenin shkëlqimin e plotë të saj në çdo kuptim. “Nevojiten ende ide për tërheqje të sa më shumë njerëzve tanë, por edhe turistë nga vendet e huaja”, tha Mexhiti.