Gara: Fluturimet u realizuan ashtu siç ishin planifikuar

Foto: Bujar Gashi

Pas grevës gjashtorëshe të punonjësve të Aeroportit Ndërkombëtar të Prishtinës “Adem Jashari”, zëdhënësja e aeroportit, Valentina Gara, mohoi se ka pasur ndryshim të fluturimeve apo anulime.

Ajo tha se të gjitha fluturimet janë realizuar ashtu siç ishin planifikuar, ndërsa ishin agjencitë ato që bënë ndryshime.

“Ne do të veprojmë konform veprimeve edhe nga ana e tyre, nuk e dimë tani si do të veprojmë. Këto anulime që kanë ndodhur janë paralajmëruar nga mbrëmë dhe besojmë që udhëtarët janë lajmëruar nga kompanitë, fluturimet e parapara për sot janë realizuar pa ndonjë pengesë”, tha Gara.

Ajo shtoi se për shkak se dje ka pasur disa pengesa në punë, është thirrur policia për të mbajtur rend dhe siguri në rast të tensionimit.

“Duke pasur parasysh se dje kemi pasur pengesa në kryerjen e punëve nga punonjësit që nuk kanë qenë pjesë e grevës, sot janë paraparë masa shtesë, të cilat janë ndërmarrë nga autoritetet relevante”, shtoi ajo.