Skip to content

Certifikohen 175 policë për ballafaqimin me turma

Pjesëtarët e Njësive për Reagim të Shpejtë përfunduan trajnimin profesional të zhvilluar në pesë grupe, në Vrellë dhe Mitrovicë.

Policia e Kosovës ka certifikuar 175 zyrtarë të Njësive për Reagim të Shpejtë (NJRSH), pas përfundimit të ciklit të trajnimeve profesionale në modulin “Ballafaqimi me Turma”, transmeton albinfo.ch.

Sipas njoftimit të Policisë, programi është zhvilluar në pesë grupe, ndërsa certifikimi i grupit të pestë dhe të fundit ka shënuar përmbylljen e tij.

Trajnimet janë realizuar nga instruktorët e Drejtorisë së Njësisë Speciale Operative, në Kampin e Njësive Speciale në Vrellë dhe në Qendrën e Njësive Speciale “Enver Zymeri” në Mitrovicë. Programi është zhvilluar nën mbikëqyrjen e Divizionit të Trajnimit, në kuadër të Departamentit të Burimeve Njerëzore.

Në ceremoninë e certifikimit morën pjesë përfaqësues të strukturave udhëheqëse të Njësive Speciale, instruktorët dhe përfaqësues të Drejtorisë Rajonale të Policisë në Mitrovicën e Jugut.

Sipas Policisë, ky program synon standardizimin e përgatitjes, avancimin e kapaciteteve profesionale dhe operative, si dhe rritjen e gatishmërisë së njësive për përmbushjen e detyrave policore./Albinfo.ch