Ministri kërkon nga BE-ja që t’i bëjë presion Serbisë për të zhdukurit

Ministri i Drejtësisë, Abelard Tahiri, në Ditën Ndërkombëtare të Personave të Zhdukur, ka kërkuar edhe një herë nga Bashkimi Evropian që t’i bëjë presion Serbisë për të zbardhur fatin e personave të zhdukur nga lufta e Kosovës

“Presioni nga shtetet e Bashkimit Evropian duhet të jetë i vazhdueshëm, në çdo takim me zyrtarët nga Beogradi, deri në hapjen e arkivave dhe informimin e plotë se çfarë ka ndodhur me trupat e qytetarëve nga Kosova”, ka thënë Tahiri.

Ai ka treguar edhe se: ”Pikërisht për këtë gjë, vitin e kaluar me një letër zyrtare, kam kërkuar nga homologët e mi në shtetet anëtare të Bashkimit Evropian që të mbajnë Serbinë përgjegjëse për këtë krim”.

Ministri tregoi se Ministrja e Drejtësisë së Francës, Nicole Belloube, në letrën e saj i ka dhënë mbështetje të plotë kërkesë së Tahirit.

“Serbia duhet të dëshmojë se është e gatshme të shkëputet njëherë e përgjithmonë nga politika e Millosheviqit, të respektoj konventat ndërkombëtare, por mbi të gjitha, të tregohet humane dhe të zbardh fatin e 1647 të zhdukurve,  prej të cilëve mbi 100 janë fëmijë”, ka deklaruar ministri.