Valmiri, Kampion Evropian i gipserëve

Valmir Dobruna me përfaqësuesen gjermane është shpallur kampion evropian në një garë të zanateve "Euro Skills", që është mbajtur nga 2 deri më 5 tetor në Lille të Francës

Lajmin e ka bërë të ditur për albinfo.ch  vetë Valmiri, i cili sapo është kthyer me dy medalje të arta nga Franca.

”Është ndjenjë e mirë të jesh fitues në një garë ndërkombëtare sikur kjo në Francë. Për mua është një eksperiencë e mirë dhe nuk do ta harroj kurrë”, tha për albinfo.ch Dobruna.

Ai ka falënderuar të gjithë ata që e kanë mbështetur në këtë garë evropiane.

Kosovari, duke përfaqësuar Gjermaninë në kampionatin evropian të stukatorëve në Lille të Francës, ka marrë më së shumti pikë në një konkurrencë të fortë  me 7 vendet e Evropës.

Valmiri ka  vetëm një vit që po bën punën e stukatorit, gipserit, në Gjermani.

Tashmë shqiptari me origjinë nga Kosova është numër 1 edhe në Gjermani, ngase ka marrë medaljen e artë “Best of Nation” në këtë profesion.

Përgatitjet për këtë garë ndërkombëtare të zanateve „Euro Skills” në Francë i kanë marrë shumë kohë Valmirit dhe kolegut të tij gjerman, Marc Armbrüster.

Sukseset e Valmirit janë mburrje për firmën dhe një lloj letërnjoftimi për nivelin e saj.

Me suksesin e tij në këtë profesion, Valmir Dobruna është bërë shembull edhe për të rinjtë që zakonisht hezitojnë të orientohen në profesione të tilla.

Ai ka thënë se me fitoren në Francë ka marrë edhe më shumë motivacion për të vazhduar punën si gipser në Gjermani. Valmiri po vijon shkollën për mjeshtër stukator.or.