MPJ: I vetëdjeguri në Francë, nuk ishte kosovar

Sipas MPJ-së kosovare, bëhet fjalë për një person nga Çadi dhe jo nga Kosova siç u transmetua në lajme. Megjithatë lajmi krijoi konfuzion në Kosovë

Ministra e Punëve të Jashtme e Kosovës e ka demantuar lajmin se personi që ia vuri flaken vetes në shenjë revolte për marrjen negativ të statusit të azilit në Francë, ishte shqiptar i Kosovës. Sipas MPJ-së, bëhet fjalë për një person nga Çadi dhe jo nga Kosova siç u transmetua në lajme. 

“MPJ ka marrë konfirmim nga autoritetet përkatëse që nuk bëhet fjalë për shtetas kosovar, por për një të tillë nga Çadi”, ka thënë për mediet kosovare, Bashmir Xhemaj, këshilltari politik i ministrit në detyrë Enver Hoxhaj.

Në mediet e Kosovës u dha lajmi se një kosovar ka tentuar të vetëdigjet si “Jan Palach”, pasi autoritetet franceze të migracionit ia kanë refuzuar lejen e qëndrimit. Madje ai u prezantua si Besim Z. i cili nga revolta ishte lyer me benzinë dhe ia kishte vënë flaken vetës.

Në Kosovë ky lajm krijoi konfuzion, madje partia opozitare Aleanca për Ardhmërinë e Kosovës akuzoi Qeverinë e Kosovës që po i shtynë të rinjtë të ikin jashtë vendit, madje edhe t’ia vejnë flaken vetes.

“Departamenti për Diasporë i Aleancës për Ardhmërinë e Kosovës përsërit edhe një herë se a duhet edhe më tutje njerëzve tanë t’u ndodhin raste e tragjedi si ai i lumit Tisa dhe ky i fundit, në kërkim të një jete më të mirë”, thuhet në reagimin lidhur me rastin në Francë.