Austriakët meremetuan shkollën e Zatriçit

"Muret e klasave ishin me myk, tavani nuk e mbante shiun dhe nyjat sanitare të papërdorshme”, përshkruan iniciatorja e projektit, Monika Hofer

Pas pensionimit, ish drejtuesja e organizatës Volkshilfe, Monika Hofer i është kushtuar fuqishëm projektit të saj të preferuar, mbështetjes së familjeve dhe institucioneve në Kosovë. Rezultati më i ri i angazhimit të saj: Saktësisht në kohën e fillimit të vitit shkollor në fshatin e izoluar malor Zatriç, që ka 650 banorë është hapur një shkollë e re fillore.

Në javët pararendëse, ndërtesa që ishte në gjendje të mjerueshme është sanuar ne mënyrë të plotë. Para kësaj ishte e paimagjinueshme që në të do të mësonin 100 nxënës. “Muret e klasave ishin me myk, tavani nuk e mbante shiun dhe nyjat sanitare të papërdorshme”, përshkruan Hoffer.

Së bashku me “Volkshilfe Österreich”, “Austrian Development Agency, me komunën vendore dhe para se gjithash me ndihmesën e fuqishme të ushtarëve të CIMIC (misioni civil i Kfor-it gjerman e austriak) ndërtesa brenda një kohe të shkurtë u kthye në nivel për t`u lakmuar.

Gjatë qëndrimit në Kosovë nuk mund të mungonte një vizitë te familja Gashi. Që kur kjo familje ne vitin 2008 është dëbuar nga Schönau i Austrisë, kontaktet me të janë ndërprerë, shkruan nachrichten.at. Kushtet e mjerueshme të jetës së tyre në një ambient ekonomikisht të rrënuar, u ashpërsuan nga humbja e dhimbshme: Në nëntor vdiq nga infarkti kryefamiljari, Ali Gashi.

“Duke i dhuruar një pako të madhe me ushqime ne patëm mundësi që së paku në mënyrë të përkohshme të ndihmojmë këtë familje”, shprehet Hofer.