Shqipëria shton masat e sigurisë për mbrojtje nga virusi Ebola

Shqipëria ka rritur masat e sigurisë edhe në pikën më të madhe kufitare detare në Durrës nga frika e përhapjes së virusit të ebolës.

Një ekip i epidemiologëve të portit detar të Durrësit ka forcuar kontrollet, duke marrë masa për të ndërgjegjësuar udhëtarët dhe marinarët mbi ebolën, simptomat dhe pasojat e saj.

Në vende të ndryshme të terminalit të udhëtarëve dhe portit janë publikuar materiale me informacione mbi ebolën.

Një autoambulancë dhe karantina janë gjithnjë në gatishmëri për të shoqëruar personat me simptoma të dyshimta, të cilët më pas duhet t’i nënshtrohen analizave të kryera në laboratorë specifikë jashtë vendit.

Përveç shkëmbimit të informacionit mbi gjendjen gjatë lundrimit me mjekët e trageteve dhe anijeve që prekin portin e Durrësit, ekipi prej 5 personash bën edhe verifikimin e gjendjes shëndetësore të udhëtarëve dhe marinarëve.

Mediat në Tiranë raportojnë se kontrollohen më shumë anijet që lundrojnë dhe ndalojnë në portet e Afrikës, kontinenti nga ku po importohet virusi i frikshëm.
Deri më sot nuk është raportuar për ndonje rast të dyshuar në Shqipëri.