14 kosovarë kapen duke hyrë ilegalisht në Gjermani

Ata, nga Kosova kishin ardhur pjesërisht përmes trafikantëve e pjesërisht krye më vete

Të dielën, më 26 tetor, në lokalitete të ndryshme të landit të Bavarisë, në afërsi të kufirit me Austrinë, në rrjetin e policisë kanë rënë së paku tri raste të kontrabandimit me të huaj pa leje qëndrimi në Gjermani.

Se vala e ikjes ilegale të kosovarëve në vendet e perëndimit nuk po tregon shenja zvogëlimi dëshmon edhe ky fakt: Në njërin nga këto tri raste të kapura bëhet fjalë për një makinë mercedes në të cilën ishin plot 14 shtetas kosovarë. Shoferi dhe trafikuesi i tyre gjerman është kontrolluar nga policia dhe pasi i është dhënë dëshmia për kallëzim penal, është lënë të vazhdojë rrugën i lirë.

14 kosovarët, sipas wochenblatt.de, e cila u referohet burimeve policore, nga Kosova kishin ardhur pjesërisht përmes trafikantëve e pjesërisht krye më vete.

Gjithsej gjatë kësaj fundjave në regjionin e përmendur kufitar janë kapur 82 persona që po hynin në Gjermani pa leje përkatëse. Shumica ishin afganë dhe sirianë. Disa prej tre i kanë deklaruar policisë se për ardhjen deri këtu kanë paguar nga 2500 deri 4000 euro.