Po bëhet vështirë për bizneset

Bizneset janë në një situatë të rëndë financiare që nga gjysma e dytë e këtij viti, kur vendi është futur në krizë politike.

​Në Kosovë janë mbi 100 mijë biznese ndërkohë që taksat nuk i paguajnë as gjysma e tyre. Ndërkaq gjatë këtij viti numri i atyre që paguajnë taksa është zvogëluar edhe më shumë. Bizneset private në Kosovë janë futur në krizë dhe si pasojë e kësaj nuk po arrijnë t’i kryejnë obligimet ndaj shtetit.

Rritja e obligimeve të bizneseve ndaj shtetit është konfirmuar edhe në raportin e Bankës Botërore “Të bërit biznes 2015”. Sipas raportit nga vendi i 58 sa ishte Kosova në vitin 2014, kësaj radhe pagesa e taksave në raport radhitet në pozitën 63.

Se bizneset nuk janë në gjendje t’i kryejnë obligimet, qoftë edhe ato ndaj shtetit, e kanë konfirmuar edhe përfaqësuesit e bizneseve, shkruan gazeta Tribuna. Sipas tyre, bizneset gjenden në një situatë të rëndë financiare që nga gjysma e dytë e këtij viti, kur edhe vendi është futur në krizë politike.

Kryetari i Odës Ekonomike Amerikane në Kosovë, Arian Zeka ka thënë për Tribuna se situata momentale politike në vend ka rritë pasigurinë e të bërit biznes.