Arabët e shohin Kosovën si vend për investime

Një delegacion faktmbledhës i nivelit të lartë të Emirateve të Bashkuara Arabe ka nisur inspektimin në Kosovë për t’i parë fushat se ku mund të investohet

Një delegacion i quajtur faktmbledhës, i Emirateve të Bashkuara Arabe (EBA) ka filluar të hënën një mision për të inspektuar fushat ku ata mund të investojnë në Kosovë. Ky delegacion i përbërë nga afarist dhe politikanë arabë, udhëhiqet nga kryesuesi i Departamentit të Zhvillimit Ekonomik, Ali Majed Al Mansoori.

Delegacioni i EBA-s ka ardhur në Kosovë me ftesën  e presidentes Atifete Jahjaga, si pjesë e bashkëpunimit Kosovë EBA.   

Pas një takimi që zhvilloi me presidenten Jahjaga, Al Mansoori tha se delegacioni është në një mision faktmbledhës, i përbërë nga përfaqësues të sektorëve të ndryshëm, me qëllim të gjetjes së fushave ku mund të ndërtohet dhe zgjerohet bashkëpunimi, me synim që ai të jetë afatgjatë.

Vizita e delegacionit nga Emiratet e Bashkuara Arabe vjen pas takimit të fundit që Presidentja Jahjaga ka zhvilluar në Abu Dhabi me Princin e kurorës, Sheikun Mohammed bin Zayed Al Nahyan, me të cilin ka biseduar për thellimin e bashkëpunimit ekonomik dhe për investimin e EBA n ë Kosovë, në fusha të ndryshme.

Presidentja Jahjaga tha se Kosova ka potenciale të mëdha edhe natyrore dhe njerëzore dhe ofron një klimë të mirë dhe siguri për investime dhe biznes, posaçërisht në fushën e bujqësisë e të energjisë, por edhe në fusha të tjera.

Delegacioni i EBA-s u takua edhe me kryeministrin Hashim Thaçi. Kryeministri Thaçi e ftoi delegacionin që në takimet me përfaqësuesit e qeverisë së Kosovës të zbulojnë sferat ku mund të investohet dhe nga të cilat mund të përfitojnë të gjitha palët.

Kryesuesi i delegacionit nga Saif Mohamed Al Mazrouei, e lavdëroi bashkëpunimin mes Kosovës dhe Emirateve të Bashkuara Arabe dhe përsëriti gatishmërinë që ky bashkëpunim të zhvillohet edhe më tutje, tash në sferën e ekonomisë dhe investimeve.