Kryetari i Prishtinës, Shpend Ahmeti, në katërvjetorin e Albinfo.ch

„Ndyshimet politike dhe demokracia në Ballkan: Cili është roli i diasporës?“, është tema e një konference që me rastin e katërvjetorit të albinfo.ch mbahet më 5 dhjetor në Bernë.

Cila është gjendja socio-politike që mbizotëron në vendet e Ballkanit? Cilat janë sfidat dhe çfarë mund të sjellë demokratizimi i rajonit? Çfarë kontributi mund të vijë nga Zvicra nëpërmjet diasporës së saj ballkanike, të cilët janë përfshirë në politikën zvicerane për evropianizimin e Kosovës dhe të rajonit? Të gjitha këto do të trajtohen në konferencën që më 5 dhjetor organizon albinfo.ch me rastin e katërvjetorit në Bernë.

Në fokus të konferencës është angazhimi i Zvicrës dhe i politikanëve në diasporë për t’u dhënë një impuls më të madh politik dhe ekonomik vendeve të Ballkanit në përgatitjet e tyre për integrimin evropian.

Konferenca, me pjesëmarrjen e personaliteteve kyç, synon të shqyrtojë mënyrat dhe rrugët që duhet ndjekur në mobilizimin e politikanëve në diasporë për të forcuar ndikimin e tyre në zhvillimin e qëndrueshëm në regjion dhe shkëmbimin e përvojave që do të shfrytëzohen në të ardhmen për mbështetjen e projekteve integruese në Ballkan.

Në konferencë pritet të marrin pjesë përfaqësues politikë edhe nga Kosova.

Mysafir special i albinfo.ch është kryetari i Komunës së Prishtinës, Shpend Ahmeti, pastaj deputeti nacional dhe politikani i njohur zviceran, njëherësh kryetar i grupit socialdemokrat të deputetëve të Asamblesë Parlamentare të Këshillit të Evropës, Andreas Gross, deputeti në Parlamentin Nacional të Zvicrës,  politikanët Ueli Leuenberger dhe Léonard Bender, politikanë shqiptaro-zviceranë nga diaspora: Përparim Avdyli, kandidat i FDP-së, deputet kantonal në Zürich, Blerim Bunjaku, kandidat i EVP-së në Winterthur për deputet të Kantonit të Zürichit, Llesh Duhanaj, kryetar i seksionit kosovar të CVP-së (Partia Kristiane Popullore) në Lucern, Qëndresa Sadriu, deputete lokale e SP-së në Glattbrugg.

Moderator i kësaj konference do të jetë kryeredaktori i “Sept.info”, Patrick Vallélian.

Konferenca “Ndyshimet politike dhe demokracia në Ballkan: Cili është roli i diasporës?” mbahet më 5 dhjetor në KULTURHOF – SCHLOSS KÖNIZ | MUHLERNSTRASSE 11 | 3098 KÖNIZ në Bernë, me fillim në orën 19, përfundon në orën 21.

Më shumë informacione për këtë mbrëmje në Bernë do të gjeni në flyerin në shtojcë. Numri i pjesëmarrësve i kufizuar.