Rusia ndalon importin bujqësor “Made in Albania”

Sipas autoriteteve ruse, produkte bujqësore me etiketën “Made in Albania” janë prodhime të BE-së. Në Moskë thonë se ky është mashtrim i BE-së me emrin e Shqipërisë

Federata Ruse ka marrë vendim që ta ndalojë importin e perimeve nga Shqipëria. Vendimi është marrë nga Agjencia Federale për Bujqësinë në Moskë dhe do të hyjë në fuqi më 8 dhjetor. Sipas autoriteteve ruse, këto produkte janë prodhime të BE-së dhe shiten në Rusi si “Made in Albania”.

Shefi i Agjencisë për Bujqësi, Sergei Dankvert ka thënë se emri i Shqipërisë po përdoret për të kamufluar importet nga Bashkimi Evropian, duke përdorur si transit Bjellorusinë apo Kazakistanin. Prndaj, sipas tij, për këto arsyeje Moska zyrtare ndalon importet bujqësore nga Shqipëria.

Ky fakt u zbulua nga një hetim i përbashkët i autoriteteve ruse me palën shqiptare, ka thënë ai.

“Nga hetimet rezultoi se çertifikatat fitosanitare të produkteve që mendohej se vinin nga Shqipëria, falsifikoheshin në Çeki. Nga të dhënat e plasuar nga pala shqiptare u vu re se sasia e prodhimit shqiptare nuk e justifikonte ngarkesën e shtuar të perimeve të importuara nga Shqipëria”, thuhet në raport.

Sipas zyrtarëve në Moskë, thjeshtë bëhej fjalë për produkte bujqësore të vendeve anëtare të Bashkimit Evropian, të cilat pajiseshin me certifikata të falsifikuara shqiptare.

Ndryshe, produktet bujqësore të Bashkimit Evropian, Australisë, Kanadasë dhe Shteteve të Bashkuara të Amerikës nuk mund të importohen në Rusi, si pasojë e embargos që këto vende ia kanë  venë Moskës, si kundërpërgjigje ndaj përfshirjes në trazirat qytetare në Ukrainë.

Përfaqësuesit e Agjencisë Federale të Bujqësisë në Rusi kanë thënë se hetimet për këto produkte do të vazhdojnë edhe me vende të tjera si Maqedonia, Bosnja dhe Zvicra, pasi dyshohet se edhe çertifikata të falsifikuara të këtyre vendeve janë përdorur për të futur prodhime të ndaluara bujqësore në Rusi.

Rusia dhe Shqipëria, siç raporton NOA, nuk kanë ndonjë traditë të bashkëpunimit ekonomik. Madje edhe investimet ruse në Shqipëri janë thuajse inekzistente. Ndërsa interesant është fakti se rreth 80 për qind e grurit dhe miellit që tregtohet në Shqipëri vjen nga Rusia nëpërmjet Maqedonisë.