Ftohen bizneset në Belgjikë për të investuar në Maqedoni

Ministri për Investime, Visar Fida, gjatë një vizite në Belgjikë ka dhënë një pasqyrë të gjendjes në fushën e investimeve në Maqedoni.

Ministri shqiptar për Investime nga Maqedonia, Visar Fida, ka zhvilluar takime të shumta me kompani nga industri të ndryshme në forumin e mbajtur në qytetin Gentit, që është organizuar nga promotori ekonomik, Kreshnik Bekteshi dhe nga Ambasada e Republikës së Maqedonisë në Mbretërinë e Belgjikës, si dhe Oda Ekonomike e Flandrisë.

Në këto takime, siç thuhet në njoftimin zyrtar të ministrisë, Fida ka prezantuar kushtet që ofron Republika e Maqedonisë për investitorët e huaj dhe njëkohësisht iu ka bërë thirrje që të investojnë në Maqedoni.
Gjatë këtyre takimeve dy kompani belge, njëra nga industria automobilistike dhe tjetra nga industria informatike, kanë shprehur interes të posaçëm për kushtet e ofruara për të filluar biznes në Republikën e Maqedonisë dhe vendosën që së shpejti të vizitojnë vendin tonë.

Ministri Fida theksoi se javët në vijim do të dihen edhe vendimet e disa kompanive për të investuar në Maqedoni, e disa prej tyre pikërisht pritet të investojnë në Zonën Teknologjike Industriale të Tetovës.