Një sukses i QKUK-së me ndihmën e mjekut të Lucernes

Me ndihmën e mjekut specialist nga spitali i Lucernës së Zvicrës, dr. Florim Cuculit, sot në Prishtinë është bërë një operacion kompleks, duke ia shpëtuar jetën një 60 vjeçari

Nën mbikëqyrjen e kardiologut të njohur nga spitali i Lucernës së Zvicrës, dr. Florim Cuculit, ekipi i Klinikës së Kardiologjisë të Qendrës Klinike Universitare të Kosovës, të mërkurën ka shënuar edhe një sukses, duke bërë një nga ndërhyrjet më komplekse në fushën e kardiologjisë invazive, “në stentimin e trungut komun të pambrojtur”.

Me këtë intervenim, siç njoftoi QKUK, i është shpëtuar drejtpërdrejt jeta të sëmurit A. A. 60 vjeç, i cili ka qenë në gjendje tejet kritike. Ky njëherit ka qenë operacioni i parë i këtij lloji që u bë në QKUK.

Një trajtim i tillë invaziv, thuhet në njoftim, bëhet vetëm në qendrat e njohura të kardiologjisë invazive në botë.

Kryemjeku i Kardiologjisë invazive në Spitalin e Lucernës dr.Florim Cuculi ka qëndruar për një vizitë pune në Klinikën e Kardiologjisë në Prishtinë nga 7 deri më 10 dhjetor, ku, përveç ligjëratave, ka bërë edhe trajtimin e pacientëve me patologji komplekse.

Sipas njoftimeve të QKUK-së, në këtë Kardiologji është shumëfishuar numri i të gjitha procedurave invazive kardiologjike, duke përfshirë edhe trajtimin me sukses të infarktit të miokardit, i cili nuk ishte bërë më herët. Këtu kryhen mesatarisht rreth 10 procedura invazive në ditë, por jo të këtij lloji.