Kapen nëntë shqiptarë klandestinë në Gjermani

Po ashtu është kapur edhe një shqiptar, në makinën e të cilit ishin tetë klandestinë

Në trenin nga Munihu në drejtim të Ulm-it një patrullë policore ka kapur të hënën, në afërsi të Günzburg-ut nëntë shqiptarë të Kosovës prej 13 deri 45 vjeçarë. I gjithë grupi kishte hyrë ilegalisht në Gjermani dhe nuk posedonin pasaporta ose viza të vlefshme.

Ndaj personave madhorë në këtë grup është ushtruar kallëzim penal në bazë të ligjit për qëndrimin e të huajve në Gjermani. Pas kësaj, policët i kanë dërguar të gjithë ata në një qendër pranimi të azilkërkuesve.

Ndërsa dy ditë para kësaj, një patrullë policore ka ndjekur një makinë Crysler Voyager në autostradë duke dashur ta kontrollojë. Por makina e ka rritur shpejtësinë në maksimum duke bërë përpjekje që të ikë. Shoferi nuk u është përgjigjur kërkesave të policisë për tu ndalur dhe ka provuar të kalojë në korsinë e majtë. Më në fund makina është ndalur në parkingun anash rrugës.

Në makinë policia ka gjetur tetë meshkuj, ndërsa shoferi shqiptar ishte nisur me ta që t`i transportonte për në Danimarkë. Po në Danimarkë ia kishin mësyrë edhe disa grupe të tjera që policia gjermane i ka kapur gjatë vikendit të kaluar. Në të gjitha rastet personat e dyshuar për trafikim do të përgjigjen penalisht ndërsa të trafikuarit janë dërguar në qendrat për pranim të azilkërkuesve.