Rikthehen kolonat, pritjet deri 3 orë

Policia gjatë kthimit për në diasporë, iu bën apel të gjithë qytetarëve që të kenë kujdes të shtuar për shkak të ngricave. Pritjet në kufij janë nga 30 minuta deri 3 orë

Policia e Kosovës njofton bashkatdhetarët se pritjet në pikëkalimet kufitare me Serbinë  jenë deri tri orë, ndërsa përkundër të ftohtit dhe borës, të gjitha rrugët janë të kalueshme. Policia gjatë kthimit për në diasporë, iu bën apel të gjithë qytetarëve që të kenë kujdes të shtuar për shkak të ngricave.  

“Në pikën kufitare në Mutivodë, gjendja e sigurisë është e qetë dhe qarkullimi i automjeteve po zhvillohet normal, dhe nuk ka pritje të gjata, ndërsa në pikë-kalimin kufitar Merdare gjendja e sigurisë, po ashtu është e qetë dhe qarkullimi i mallrave dhe automjeteve zhvillohet normal në hyrje, ndërsa në dalje të Republikës së Kosovës në këtë pikë është regjistruar kolonë e automjeteve rreth 1.5 km, dhe pritjet janë prej dy deri tre orë”, njofton Policia.

Përveç Merdares, policia ka njoftuar se edhe në pikën kufitare Dheu i Bardhë, pritjet janë rreth 2 orë e më tepër dhe kolona është rreth 3 kilometra në dalje, kurse në hyrje është normale

Në pikën kufitare Muçibabë, policia ka njoftuar se pritjet janë rreth 30 minuta ngase kolona në dalje është rreth 300 metra derisa në hyrje është normale. Policia e Kosovës ka apeluar tek të gjithë qytetarët që të shfrytëzojnë për qarkullim pikëkalimet kufitare, ku radhët dhe pritjet janë më të shkurta.