I vdekuri në Hungari është 54 vjeçar nga Ferizajt

Përsoni që humbi jetën në kufirin serbo-hungarez është identifikuar. Ai është Ali Fetahu (1960) nga fshati Talinoc i Muhaxherëve të Ferizajt

Autoritet hungareze kanë identifikuar kosovarin që humbi jetën në kufirin serbo-hungarez. Ai është 54 vjeçari Ali Fetahu (1960) nga fshati Talinoc i Muhaxherëve të Ferizajt, i cili kishte humbur jetën nga të ftohtit gjatë përpjekjes për të emigruar në shtetet e Bashkimit Evropian.

Mësohet se i ndjeri ka pasur probleme shëndetësore, ndërsa familjarët e tij të mërkurën e kanë hapur të pamën dhe po presin ngushëllime. Ata thonë se i ndjeri nuk i ka pasur edhe aq keq punët ekonomikisht, por që ka shpresuar që në perëndim të gjejë ndonjë mënyrë më të mirë për shërim.

Një i afërm i viktimës ka thënë për mediet kosovare, se i ndjeri ka pasur një sulm cerebral dhe ka qenë një kohë i paralizuar, por me kalimin e kohës gjendja i është përmirësuar.

“Ka qenë i sëmurë nga paraliza. Nuk e di si ju mbush mendja, të gjithë kemi qenë kundër shkuarjes së tij. Nuk ka qenë në kushte të vështira e ka pasur një pension. Është nis me 25 dhjetor të vitit të kaluar, nuk kemi pas asnjë informacion prej tij kështu që djali i tij është nisur për në Hungari për ta kërkuar por është kthyer pa asnjë informacion për të. Fatkeqësisht sot e morëm lajmin prej Ambasadës për vdekjen e tij,” tha kushëriri i tij, Ajet Fetahu, kushëri i Aliut.

Mësohet se i ndjeri ka lënë pas vete familjen, bashkëshorten, katër djem dhe dy vajza. Familjarët thonë se varrimi i të ndjerit pritet të bëhet të shtunën, ngase fillimisht kufoma e tij duhet të dërgohet në Stamboll e tek më pastaj të kthehet në atdhe.

Edhe kryetari i Ferizajt, Muharrem Sfarqa, përmes një komunikate për medie i ka shpreh ngushëllime familjes Fetahu për humbjen e të afërmit të saj, si dhe ka shprehë brengosjen e thellë për shkak të përmasave që ka marrë dukuria e ikjes së banorëve nga Ferizaj dhe nga Kosova.

Ndryshe Ambasada e Republikës së Kosovës në Hungari është informuar nga autoritetet e shtetit hungarez për gjetjen e trupit të pajetë të një shtetasi të Kosovës në territorin e Hungarisë. Përmes një njoftimi, sqarohet se Ambasada e Kosovës në Hungari ka filluar procedurat për kthimin sa më shpejt të trupit të pajetë të shtetasit kosovar në atdhe.

Ministria e Punëve të Jashtme e Republikës së Kosovës ka vendosur kontakte me familjarët e të ndjerit, të cilëve iu ka shprehur ngushëllimet më të sinqerta për humbjen e të afërmit të tyre.