Kapet kosovari me letra bullgare, po ndiqej me urdhërarrest

Prokuroria e Passau-t, prej katër vitesh ishte duke e kërkuar personin në fjalë për shkelje të ligjit mbi narkotikët

Me rastin e kontrollimit të makinës në autostradën A6 personi 54 vjeçar u tregon policëve lejen bullgare të identitetit. Policëve u bien në sy disa parregullsi në këtë dokument të personit që thoshte se po udhëtonin nga Belgjika drejt Cekisë. Ai po ashtu pohon se shoferi i makinës ishte shok i tij. Gjë që ky i dyti e mohon duke thënë se as që e njeh dhe se e kishte marrë thjesht si të huaj në makinë.

Duke i kontrolluar kuletën “bullgarit”, policët zbulojnë një patentë të falsifikuar shoferi e pastaj edhe një pasaportë bullgare të falsifikuar.  

Vetëm pasi shkojnë në selinë e tyre, zyrtarët policorë e zbulojnë përfundimisht identitetin e vërtetë të “bullgarit”. Ai në të vërtetë ishte shtetas kosovar dhe përveç kësaj, ndaj tij ishte shpallur një urdhërarrest. Prokuroria e Passau-t, prej katër vitesh ishte duke e kërkuar personin në fjalë për shkelje të ligjit mbi narkotikët.

Ai duhet të vazhdojë vuajtjen e dënimit me burg edhe për 1023 ditë ose afër tre vjet. Hetimet e mëtejme kanë treguar se për kosovarin po interesoheshin edhe autoritetet franceze dhe ndaj tij kishin shpallur një fletarrest evropian po ashtu për delikte me drogë. Kur të gjitha këtyre tash u shtohet edhe kallëzimi penal për falsifikim dokumentesh, kosovari i prezantuar si bullgar pritet të ketë probleme serioze me ligjin.