Dalin rezultatet për alergjinë e anëtarëve të KQZ-së

Përkundër se gjendja e 12 zyrtarëve KQZ-së që kanë pasur alergji gjatë verifikimit të votave nga Serbia është stabile, ata po vazhdojnë të qëndrojnë në Klinikën Infektive, teksa sot rezultatet laboratorike kanë treguar se nuk kanë infeksione ngjitëse.

Drejtoresha e Klinikës Infektive, Lindita Ajazaj-Berisha, në një konferencë për media the se të gjitha analizat që u janë bërë kanë treguar se nuk ka infeksione, përcjell albinfo.ch.

“Gjendja shëndetësore është e mirë pritet që duke e shikuar gjendjen të lirohen për në shtëpi. Në bazë të rezultateve të analizave, nuk ka infeksione, të gjitha analizat janë në normë”, tha ajo.

Se rezultatet laboratorike kanë dalë mirë e tha edhe drejtori i Institutit Kombëtar të Shëndetësisë Publike, Naser Ramadani.

Ndërkaq, Drejtori i SHSUK-së, Basri Sejdiu, tha se gjendja e 12 pacientëve është e mirë. Për dallim nga dje që u tha se janë 11 zyrtarë, sot drejtoresha e Infektives bëri të ditur se ka ardhur edhe një pacient.