Tifozëve kosovarë u sekuestrohet një çantë me mjete piroteknike

Policia e Shtetit kërkon mirëkuptimin e tifozërisë dhe sportdashësve që të respektojnë me rigorozitet udhëzimet e dhëna nga Policia

Një çantë plot me fishekzjarre dhe kapsolla është sekuestruar nga Policia në pikën kufitare në Morinë, pas kontrollit që iu bë një autobusi me tifozë nga Kosova, të cilët po udhëtonin të organizuar drejt Shqipërisë për ndeshjen kundër Francës.

Policia e Shqipërisë ka njoftuar se mjetet e sekuestruara në autobusin që drejtohej nga B.M., do të futeshin në stadiumin “Arena Kombëtare” në Tiranë gjatë natës së sotme, shkruan Gazeta Sinjali.

“Në kuadër të masave të marra për garantimin e rendit dhe sigurisë, parandalimin e futjes së fishekzjarrëve dhe kapsollave në stadium gjatë ndeshjes që do të luhet mbrëmjen e sotme në stadiumin “Arena Kombëtare”, në Tiranë, Policia ka shtuar masat e kontrollit duke filluar që në hyrje në pikat e kalimit kufitarë dhe deri në momentin që tifozët do hyjnë në stadium”, thuhet mes tjerash në njoftimin e Policisë.

Kontrolle të ngjashme do të ketë edhe në pikat e tjera kufitare dhe në çdo ambient ku dyshohet se mund të ketë fishekzjarre dhe kapsolla, si dhe për elementë me precedent kriminal që mund të tentojnë që t’i fusin në stadium.

Policia e Shtetit kërkon mirëkuptimin e tifozërisë dhe sportdashësve që të respektojnë me rigorozitet udhëzimet e dhëna nga Policia dhe Federata e Futbollit, dhe të mos tentojnë për të futur në stadium sende të kundërligjshme, pasi do përballen me pasojat ligjore.

Kujtojmë se janë tifo grupi “Plisat”, të cilës paraditen e sotme janë nisur drejt Tiranës për ta mbështetur Shqipërinë në ndeshjen e madhe kundër Francës, e cila fillon nga ora 20:45, përcjell albinfo.ch.

---