Tiranasit kthehen në shtëpi, trafik në të gjitha hyrjet e kryeqytetit

7800 qytetarë të zonave të Durrësit,Thumanës dhe Tiranës janë kthyer në Shqipëri pas tërmetit

Mediat nga Shqipëria bëjnë të ditur se mijëra qytetarë të zonave të prekura nga tërmeti i 26 nëntorit, të strehuar në Kosovë, po rikthehen në Shqipëri përmes pikës së kalimit kufitar të Morinës.

Thuhet se shkaku i kthimit ka të bëjë me punën dhe vlerësimin e dëmeve në banesat e tyre, por edhe se e kanë hequr pak frikën që i kapi.

Në pikën e kalimit kufitar të Morinës ishte edhe Ambasadori i Shqipërisë në Kosovë, Qemal Minxhozi, i cili tha se pas 26 nëntorit në Kosovë kanë hyrë 17 mijë e 500 qytetarë të zonave të prekura nga tërmeti.

Vlen të theksohet se vetëm të premten dhe të shtunën janë kthyer në Shqipëri 7800 qytetarë të zonave të Durrësit, Thumanës dhe Tiranës.

Po ashtu, fluksi i kthimit po vijon mbrëmjen e sotme jo vetëm nga jashtë vendit, por edhe brenda, pasi shumë qytetarë të Tiranës dhe Durrësit që u larguan në drejtim të juglindjes po kthehen në shtëpitë e tyre.

Për këtë arsye, të gjitha hyrjet e kryeqytetit po përballen me një fluks të lartë makinash, çka po sjell edhe probleme në trafik, përcjell albinfo.ch.

---