Skip to content

Një dekadë pas referendumit për Brexit, Britania dhe BE-ja afrohen me marrëveshje të reja

Paketa përfshin lehtësimin e tregtisë dhe një skemë që do t’u mundësojë deri në 100 mijë të rinjve nga secila palë të jetojnë, punojnë dhe studiojnë në territorin e palës tjetër.

Mbretëria e Bashkuar dhe Bashkimi Evropian kanë përfunduar negociatat për një paketë të re marrëveshjesh, duke shënuar një hap drejt forcimit të marrëdhënieve dhjetë vjet pas referendumit për Brexit-in, përcjell albinfo.ch.

Marrëveshjet u njoftuan më 20 nëntor, në samitin e zhvilluar në Bruksel ndërmjet kryeministrit britanik, Andy Burnham, dhe drejtuesve të institucioneve evropiane.

Sipas qeverisë britanike, paketa synon lehtësimin e tregtisë së produkteve ushqimore dhe bujqësore, lidhjen e tregjeve të emetimeve të karbonit dhe krijimin e mundësive të reja për të rinjtë.

Skema e re do të jetë e hapur për qytetarët britanikë dhe të BE-së të moshës 18 deri në 31 vjeç. Ajo parashikon deri në 100 mijë pjesëmarrës nga secila palë, me mundësi qëndrimi deri në tre vjet për punë, studime apo udhëtim.

Programi do të funksionojë përmes vizave dhe nuk përbën rikthim të lëvizjes së lirë. Pjesëmarrësit nuk do të përfitojnë automatikisht të drejtën për ndihma sociale dhe nuk do të mund të marrin familjarë në ngarkim përmes kësaj skeme.

Megjithatë, mundësitë e reja nuk hyjnë menjëherë në zbatim. Në deklaratën e përbashkët, palët synojnë zbatimin e marrëveshjes deri në vitin 2028 dhe vënien në dispozicion të mundësive për të rinjtë jo më vonë se janari 2030.

Deklarata konfirmon gjithashtu pjesëmarrjen e Mbretërisë së Bashkuar në programin Erasmus+ gjatë vitit 2027./Albinfo.ch