Altin Lala zbulon të ardhmen e Milot Rashicës

Rashica ka luajtur 12 ndeshje për Werderin këtë sezon, ka shënuar tetë gola dhe ka dhuruar tri asistime

Rashica do të vazhdojë të luajë në Bundesliga… të paktën deri në qershor të vitit 2020.

Talenti 23-vjeçar i Kombëtares së Kosovës, Milot Rashica, s’do të largohet nga Werder Bremen, të paktën jo në afatin kalimtar të janarit.

Lajmin e ka konfirmuar agjenti i lojtarit, Altin Lala. Në një intervistë për ‘Kicker’, Lala ka thënë që as që bëhet fjalë që Miloti të largohet nga Bundesliga në janar.

23-vjeçari është lidhur me një transferim në Premierligë, ku në mesin e shumë ekipeve të interesuar, seriozisht është edhe Aston Villa, por Rashica përfundimisht “do të qëndrojë te Werder deri në fund të sezonit”, tha Lala.

“Afati kalimtar i dimrit nuk është dhe s’do të jetë shqetësim”, shtoi Lala në një intervistë për ‘Kicker’.

Rashica ka luajtur 12 ndeshje për Werderin këtë sezon, ka shënuar tetë gola dhe ka dhuruar tri asistime. Ai ka kontratë me klubin gjerman deri më 2022, përcjell Albinfo.ch.

---