Durrës: Ekspertët zviceranë po inspektojnë objektet e dëmtuara

Ekspertët e verifikimit pas tërmetit po vijojnë ende vlerësimin e objekteve në qytetin e Durrësit.

Sipas informacioneve të fundit, grupet e ekspertëve, inxhinierëve dhe arkitektëve shqiptarë së bashku me ata të huaj, zviceranë, italianë, francezë, rumunë dhe izraelitë po vijojnë vlerësimin e objekteve në qytetin e Durrësit.

Duhet theksuar se pas inspektimeve të kryera në çdo shtëpi, ekspertët u shpjegojnë banorëve se nëse pallati apo ndërtesa ka një shenjë të kuqe, do të thotë që konsiderohet e pabanueshme, dhe nëse pallati ka një kryq jeshil, do të thotë se nuk është i dëmtuar nga tërmeti dhe se ata mund të kthehen të qetë në banesën e tyre.

Pas tërmetit të ndodhur në Shqipëri, ndër shtetet e para që reagoi në ndihmë ishte pikërisht Zvicra, duke dërguar shumë ekspertë zviceranë për punën në terren në vlerësimin e gjendjes dhe stabilitetin e ndërtesave në Shqipëri, veçmas në zonat e prekura nga tërmeti, shkruan albinfo.ch.

Disa ekipe specialistësh të mobilizuar nga Qeveria zvicerane qëndruan në Shqipëri për të ndihmuar vendin me pasojat e tërmetit më të rëndë në dekadat e fundit.

Ekipi përfshiu shumë ekspertë në dy fusha të cakuara si inxhinierë që vlerësuan gjendjen e ndërtesave dhe ekspertë që vlerësuan nevojat dhe planifikimi i veprimeve në përgjigje të tyre. /Albinfo.ch.

---