Norvegji: Shkolla shqipe pajiset me tekstet e ardhura nga Shqipëria

Shkolla shqipe në Olso do të startojë me tekste të reja shkollore

Për herë të parë Shkolla shqipe në Oslo të Norvegjisë do të zhvillojë orët e saj mësimore me tekstet e dërguara falas nga Qendra e Botimeve për Diasporën, në bashkëpunim me Ministrinë për Evropën dhe Punët e Jashtme e Postën Shqiptare dhe nën kujdesin e veçantë të ministrit të Shtetit për Diasporën, shkruan albinfo.ch.

Pa dyshim që kjo nismë është shumë e mirëpritur për Shkollën e parë shqiptare në Oslo, e quajtur “Naim Frashëri”.

Ministria e Diasporës së Shqipërisë, në bashkëpunim me Qendrën Botuese për Diasporën, dhuroi kësaj shkolle librat për mësimin e gjuhës shqipe.

Thuhet se ato me të arritur në Oslo u tërhoqën nga koordinatori i shkollës, Metush Bajrami.

Librat do të regjistrohen, e më pastaj do të fillojë ndarja tek ata nxënës që ndjekin mësimet në shkollën “Naim Frashëri”.

Përfaqësuesit e kësaj shkolle kanë falënderuar ministritë për këtë vepër që është në të mirën e nxënësve nga diaspora, në mënyrë që të kultivohet dhe të zhvillohet gjuha shqipe.

“Falënderojmë dy ministritë për ndihmën që na ofruan, ndihmë kjo që do të lehtësojë punën në mësimdhënie për mësuesit dhe gjithashtu duke motivuar edhe më tepër fëmijët tanë, për të vijuar mësimet në gjuhën amtare. /Albinfo.ch

 

 

 

---