Skip to content

Ekspozita “Housing Albanian Culture” prezanton trashëgiminë arkitekturore shqiptare në Berlin

Përmes fotografive, dokumenteve arkivore, filmimeve dhe maketeve arkitekturore, ekspozita sjell historinë e Shtëpive të Kulturës në Shqipëri gjatë shekullit XX dhe rëndësinë e tyre në jetën shoqërore e kulturore.

Në Berlin është hapur ekspozita “Housing Albanian Culture”, e cila i kushtohet historisë së Shtëpive të Kulturës në Shqipëri gjatë shekullit XX, duke vënë në pah rolin e tyre në zhvillimin kulturor dhe shoqëror të vendit, transmeton albinfo.ch.

Ekspozita është organizuar në kuadër të Javës Evropiane të Shqipërisë 2026 dhe përmes fotografive, materialeve arkivore, pamjeve filmike dhe maketeve arkitekturore prezanton një pjesë të trashëgimisë arkitekturore shqiptare dhe kujtesës kolektive.

Në fokus është lidhja ndërmjet arkitekturës, kulturës dhe identitetit shqiptar, si dhe rëndësia që kanë pasur Shtëpitë e Kulturës në jetën e komuniteteve përgjatë shekullit të kaluar.

E kuruar nga Tea Mersuli, ekspozita është vendosur në hapësirat e BHROX bauhaus reuse në Berlin dhe zhvillohet gjithashtu në kuadër të European Triennial of Modernism dhe New European Bauhaus 2026.

Projekti realizohet me mbështetjen e Ambasadës së Republikës së Shqipërisë në Gjermani, Autoritetit të Trashëgimisë së Berlinit (LDA), Culturalb dhe Ministrisë së Turizmit, Kulturës dhe Sportit të Shqipërisë.

Ekspozita do të jetë e hapur për vizitorët deri më 11 dhjetor 2026./Albinfo.ch