Prokurori kërkon burgim të përjetshëm për Jeton G., vrasësin e truprojës

36-vjeçari, shtetas zviceran me prejardhje nga Kosova, sipas prokurorit ishte një gënjeshtar patologjik, kishte një të kaluar kriminale, ishte i papërmirësueshëm dhe kurrë nuk ishte distancuar nga vepra e kryer

Në gjykimin për vrasje, që po zhvillohet para Gjykatës së Qarkut në Cyrih, prokurori publik ka lexuar sot (e mërkurë) argumentimin e akuzës. Sipas tij, i dyshuari kryesor duhet të dënohet me burgim të përjetshëm, plus t`i shqiptohet edhe masa e kujdestarisë (në një ent psikiatrik)., shkruan nzz.ch.

Përveç kësaj, ai, sipas prokurorisë duhet të paguajë një gjobë prej 360 njësish ditore nga 30 franga.

Prokurori e ka mbështetur akuzën duke thënë se i akuzuari kishte qenë delikuent qysh në fëmijëri, transmeton albinfo.ch. 36-vjeçari, shtetas zviceran me prejardhje nga Kosova, sipas prokurorit ishte një gënjeshtar patologjik, kishte një të kaluar kriminale, ishte i papërmirësueshëm dhe kurrë nuk ishte distancuar nga vepra e kryer.

Gjykimi që po zhvillohet në Gjykatën e Qarkut në Cyrih ka të bëjë me një vrasje që është bërë në mars të vitit 2015. Në orët e para të mëngjesit, dy personat, të armiqësuar qysh më parë mes vete, ishin takuar në Cyrih-Affoltern, transmeton albinfo.ch. Takim i në mes të të dyshuarit kryesor dhe viktimës (Boris N.), ishte bërë për të sqaruar konfliktin që kishin. Të dy ata po shoqëroheshin nga shokë të tyre.

Në vazhdim kishte ndodhur përleshja. Njëri nga të akuzuarit e tashëm kishte shkrepur armën në ajër, duke bërë që grupi kundërshtar të ikte. I dyshuari kryesor (Jeton G.)  më pas kishte kapur armën dhe kishte gjuajtur në drejtim të kundërshtarëve të tij që po iknin, përcjell albinfo.ch.

Për pasojë, pikërisht kundërshtari i tij, një person i njohur si bodigard, sportist i sporteve luftarake dhe huligan me prejardhje malazeze u qëllua në shpinë dhe vdiq nga plaga e marrë.

---