Kosnett përshëndet vendimin për konfiskimin e rreth 1 milion eurove pasuri

Ambasadori amerikan, Philip Kosnett, e konsideron si hap të madh vendimin e disa ditëve më parë të marrë nga Gjykata e Apelit për konfiskimin e rreth 1 milion euro pasuri të paligjshme.

“Drejtësia në Kosovë ndërmori një hap të madh me vendimin e Gjykatës për të konfiskuar gati një milion euro të marra përmes pastrimit të parave – një mesazh i qartë se askush nuk do të lejohet të shijojë pasuri të paligjshme. Qytetarët meritojnë të shohin të njëjtën angazhim për drejtësi nga të gjitha institucionet e Kosovës në të gjitha rastet”, shkruan ai në Twitter.

Departamenti Special i Gjykatës së Apelit të hënën ua ka vërtetuar dënimet me burgim me kusht prej dy vjetësh të akuzuarve F.S. dhe M.S.

Atyre gjithashtu, iu është vërtetuar edhe dënimi plotësues i shqiptuar nga ana Gjykatës Themelore në Prishtinë, për konfiskimin e pasurisë/ sendeve të përfituara nga kryerja e veprës penale në shumën prej 946,820.84 eurosh./