Italia shpreson se më e keqja mund të marrë fund shumë shpejt

Italia shpreson se më e keqja së shpejti mund të kalojë, përderisa po ngadalësohet niveli i infeksioneve të reja.

Shpejtësia me të cilën po përhapet koronavirusi në të gjithë Italinë duket se po ngadalësohet, duke nxitur shpresat se shpërthimi mund të jetë duke arritur kulmin e tij.

Të hënën, rritja ditore e numrit të përgjithshëm të infeksioneve, 28 000, ishte vetëm rreth 13%, nga normat e 17-21% në katër ditët e kaluara.

“Prirja po ulet dhe ne e kemi parasysh këtë fakt”, tha kreu i Agjencisë së Mbrojtjes Civile, Angelo Borrelli, ndërsa prezantoi shifrat.

Sidoqoftë, ekspertët po bëjnë thirrje për kujdes.

“Kulmi [i shpërthimit] nuk mund të parashikohet”, tha sot Antonello Maruotti, një profesor i statistikave në universitetin ‘’Lumsa’’ të Romës.

Maruotti është pjesë e një ekipi, Stat-Group19, i cili ka publikuar parashikime të cilat kanë qenë mjaft të besueshme, por vetëm brenda një periudhe treditore.

“Unë jam shumë i sigurt në lidhje me parashikimet tona të së njëjtës ditë dhe mjaft të sigurt për nesër’’, theksoi ai.

Maruotti tha se grupi i tij priste që numri i përgjithshëm i rasteve të rritej në 32 735 sot në mbrëmje, pastaj në 38 207 të mërkurën dhe 44 599 të enjten.

Një dokument i qeverisë thotë që shpërthimi mund të arrijë kulmin të mërkurën dhe mund të përfundojë në fund të prillit me rreth 92 000 raste në total.

Por, shumë e shohin këtë si tepër optimiste.

Përhapja në Itali filloi më 20 shkurt dhe ka qenë e lidhur me 2 158 vdekje deri më tani.

Italia është vendi më i prekur në botë pas Kinës, origjina e koronavirusit.

---