Zvicra vendos rregulla të reja për azilin në kohën e koronavirusit

Këshilli Federal ka vendosur të mërkurën të marrë masa për mirëmbajtjen e procedurës së azilit edhe gjatë krizës së koronavirusit

Që nga java e ardhshme, dëgjimet (intervistat) e azilkërkuesve do të bëhen përmes konferencës video ose telefonike. Në këtë mënyrë, mund të zvogëlohet numri i njerëzve të pranishëm në të njëjtën hapësirë, thuhet në një komunikatë të SEWM (Sekretariati Shtetëror për Migracion).

Për më tepër, afati i ankesave kundër vendimeve të azilit në procedurën e përshpejtuar, do të zgjatet në 30 ditë pune në vend të shtatë, sa ka qenë deri më tani. Azilkërkuesit e refuzuar gjithashtu kanë më shumë kohë për t`u larguar vullnetarisht nga Zvicra.  Afati mund të zgjatet deri në 30 ditë – madje edhe më gjatë nëse është e nevojshme.

Për të krijuar më shumë vende për azilkërkuesit, ndërtesat ushtarake dhe civile do të shndërrohen më shpejtë se në kushtet normale, në vende për strehimin e kësaj kategorie. Kjo sepse rregullat e higjienës së Zyrës Federale të Shëndetit Publik kërkojnë më shumë hapësirë. Prandaj, kantonet duhet të sigurojnë akomodim shtesë nëse është e nevojshme.

Marrja në pyetje e azilkërkuesve gjithashtu mund të bëhet edhe nëse përfaqësuesi ligjor “për shkak të një pandemie në rajone të caktuara” nuk mund të marrë pjesë aty.

---