Aleksandar Vuçiq ka pretenduar se prej vitesh nuk mund të hyjë në Kosovë dhe se kryeministri Albin Kurti nuk ua lejon hyrjen as anëtarëve të familjes së tij për vizita private.
Deklaratën e bëri të shtunën, më 14 nëntor, gjatë një paraqitjeje në televizionin serb Pink, duke komentuar vizitën e përfaqësuesve të Listës Studentore në Kosovë dhe takimin e tyre me peshkopin Teodosije në Graçanicë, përcjell albinfo.ch.
Vuçiqi e krahasoi lejimin e kësaj vizite me kufizimet që pretendon se vlejnë për të dhe familjarët e tij.
“Asnjë nga familjarët e mi nuk mund të hyjë as privatisht, sepse Albin Kurti nuk e lejon këtë”, deklaroi ai.
Ai hodhi gjithashtu dyshime mbi raportet e Listës Studentore me Kurtin, duke pretenduar se lejimi i hyrjes së përfaqësuesve të saj dëshmon bashkëpunimin mes tyre./Albinfo.ch
