Itali: Bonuse deri në 500 euro kush blen biçikletë

Qeveria italiane ka vendosur të subvencionojë blerjen e biçikletave

Fazat lehtësuese kanë filluar në Evropë, por që siguria e njerëzve nga Covid-19 ende është në pikëpyetje, andaj një nga një qëllimet kryesore me të cilën përballen qeveritë është se si t’i bëjnë popullsitë e tyre të lëvizin të sigurt, pa rrezikun e infektimit, përcjell albinfo.ch.

Me shërbime të zvogëluara të transportit publik dhe me kushtin e distancimit fizik, qeveritë në gjithë kontinentin po kërkojnë mënyra të reja për të inkurajuar njerëzit të ecin apo të përdorin biçikletat.

OBSH-ja së fundi ka deklaruar: “Kurdo dhe kudo që të jetë e mundur, duhet marrë në konsideratë përdorimi i biçikletave për të shmangur dyndjen në transportin publik”.

Nërkohë qeveria italiane ka vendosur të subvencionojë blerjen e biçikletave për të gjithë qytetarëve e saj deri në masën 70%. Kjo nismë është pjesë e planit të rihapjes së Italisë ku transporti me mjete urbane do të jetë më i kufizuar. Për ta dekurajuar më shumë përdorimin e këtij transporti për periudhën pas-karantinës, Ministria e Infrastukturës dhe Transportit ka propozuar të inkurajojë blerjen e skuterëve, biçikletave dhe automjeteve personale me energji elektrike, përcjell tutje albinfo.ch.

Nëpërmjet tij synohet të paguhet nga shteti 65-70% e vlerës së mjetit, me një tavan prej 500 eurosh.

---