Trump shtyn samitin G7, kërkon të shtojë vende në listën e ftesave

Presidenti amerikan, Donald Trump, tha të shtunën se do të shtyjë samitin e G7-ës, për të cilin kishte shpresuar të mbahet muajin tjetër. Ai po synon të zgjerojë listën e të ftuarve për të përfshirë Australinë, Rusinë, Korenë e Jugut dhe Indinë.

Duke folur para gazetarëve në Uashington, Trump tha se G7, i cili grupon ekonomitë më të përparuara në botë, ishte një “grup shumë i vjetëruar i vendeve” në formatin e tij aktual. “Unë po e shtyj atë, sepse nuk e ndiej që ky G7 përfaqëson siç duhet atë që po ndodh në botë”, tha Trump.

Ai tha se do të shtyjë samitin deri në shtator, e që ishte planifikuar të mbahej në qershor, transmeton Reuters, përcjell albinfo.ch.

Ishte e paqartë nëse dëshira e Trump për të ftuar vendet shtesë ishte një përpjekje për të zgjeruar përgjithmonë G7.

Në disa raste të mëparshme, ai sugjeroi që të shtohej Rusia, duke pasur parasysh atë që ai e quajti ‘rëndësi strategjike globale të Moskës’.

Grupi G7, nikoqir i të cilit do të jetë SHBA-ja këtë vit, përbëhet nga Kanadaja, Franca, Gjermania, Italia, Japonia dhe Britania, përcjell tutje albinfo.ch.