Italia shpreson që BE-ja do të rihapë kufijtë për italianët më 15 qershor

FILE PHOTO: 5-Star Movement leader Luigi di Maio after consultations with Italian President Sergio Mattarella in Rome, Italy, August 22, 2019. REUTERS/Remo Casilli/File Photo

Luigi Di Maio, ministri i Jashtëm italian, shpreson që shtetet e Bashkimit Evropian do të rihapin kufijtë për italianët më 15 qershor.

Italia – një prej vendeve të goditura më së keqi nga sëmundja COVID-19, që e shkakton koronavirusi – hapi kufijtë për shtetasit e BE-së më 3 qershor, por shumica e vendeve evropiane ende kanë kufizime për shtetasit italianë.

“Data 15 qershor është shumë e rëndësishme për qytetarët tanë”, tha Di Maio gjatë vizitës së tij në Slloveni.

Homologu i tij slloven, Anze Logar, tha se “kushtet shëndetësore në Italia janë duke u përmirësuar… Jam optimist për 15 qershorin”.

Di Maio tha se Gjermania dhe Zvicra po ashtu kanë dhënë sinjale se mund të rihapin kufijtë me Italinë nga kjo datë. Ai tha se hapja e kufijve do të nënkuptonte se të gjithë qytetarët italianë – përfshirë edhe ata që janë nga zonat më të prekura nga koronavirusi – të mund të udhëtojnë.

Italia deri më tani ka raportuar mbi 234 mijë raste me koronavirus dhe mbi 33 mijë të vdekur, përcjell Albinfo.ch.