Aeroporti i Prishtinës “Adem Jashari”, i gatshëm për nisjen e fluturimeve

Foto: Aeroporti i Prishtinës

Në mbledhjen e Qeverisë së Kosovës që u mbajt më 7 qershor, u vendos që të hapen kufijtë tokësorë të Kosovës, të cilët ishin mbyllur si masë parandaluese e përhapjes së COVID-19. Ministri i Infrastrukturës dhe Ambientit, Arban Abrashi, tha të martën se pret që fluturimet të nisin brenda dhjetë ditësh.

Zëdhënësja e Aeroportit të Prishtinës “Adem Jashari”, Valentina Gara, ka thënë se janë të gatshëm për të nisur punën.

“Ne jemi të gatshëm me të gjitha kapacitetet humane dhe teknike dhe bazuar në Agjencinë Europiane të Sigurisë së Aviacionit si dhe rregullativat e autoriteteve të tjera relevante që t’u ofrojnë shërbime kompanive ajrore dhe udhëtarëve si në nisje, po ashtu edhe në ardhje”, ka thënë Gara.

Por, Gara ka bërë të ditur se për të nisur punën transporti ajror, i duhet dritë e gjelbër nga Qeveria e Kosovës.

“Mirëpo për udhëtarët në ardhje presim që në ditët në vazhdim të kemi një vendim të kemi një vendim nga Qeveria e Kosovës për lejimin e tyre dhe t’i kthehemi operimeve të plota”, deklaroi Gara, shkruajnë mediat kosovare, përcjell albinfo.ch.

Ndërkohë, ministri i Infrastrukturës dhe Ambientit, Arban Abrashi, të dielën në mbledhjen e Qeverisë tha se do të nisë konsultimet me autoritetet përkatëse për hapjen e aeroportit.

E të martën ai tha se pret që fluturimet në Aeroportin Ndërkombëtar të Prishtinës “Adem Jashari” të rinisin brenda dhjetë ditësh.