Aplikacioni i ri gjurmues në Gjermani, ‘hap i madh’ në luftën kundër koronavirusit

Qeveria gjermane zbuloi sot aplikacionin e ri të gjurmimit të koronavirusit, duke e quajtur atë një “hap të madh” në luftën pandemike.

Autoritetet kanë shpresën se njerëzit do ta shkarkojnë dhe të përdorin aplikacionin falas – i pari në llojin e tij në vend.

“Shkarkimi dhe përdorimi i tij është një hap i vogël për secilin nga ne, por një hap i madh në luftën kundër pandemisë”, tha shefi i shtabit të kancelares Angela Merkel, Helge Braun, në shfaqjen e aplikacionit të ri në Berlin, shkruan thelocal.de, përcjell albinfo.ch.

Ai tha se nuk ishte aplikacioni i parë për koronavirusin që lansohet në botë, por është më i miri. Ai shtoi se qytetarët mund të mbështeten në standarde të larta të mbrojtjes së të dhënave dhe sigurisë.

Ministri Federal i Shëndetësisë, Jens Spahn, tha se aplikacioni ishte një “mjet i rëndësishëm shtesë” për t’u përballur me krizën e koronavirusit. Ai tha se qëllimi tani është të parandalohet një valë e dytë e mundshme e pandemisë.

“Sidomos në një fazë kur ka përsëri shumë më tepër kontakte, kur fillon sezoni i pushimeve është e rëndësishme të gjurmoni zinxhirët e infeksionit shumë më lehtë dhe shpejt”, shtoi ai.

Aplikacioni, i cili funksionon përmes Bluetooth, është krijuar për të bërë më të lehtë gjurmimin e infeksioneve. Nëse një përdorues ka testuar pozitiv dhe e ka ndarë këtë në aplikacion, ai u raporton përdoruesve të tjerë se ata kanë kaluar kohë pranë një personi të infektuar. Atëherë ai person mund të testohet – edhe pa simptoma, dhe në kurriz të kompanive të sigurimit shëndetësor, përcjell tutje albinfo.ch.