Lajme

Biden akuzon Trumpin se është dorëzuar në luftën me Covid-19

E enjte, 18 Qershor 2020 - 21:30 albinfo.ch

Kandidati demokrat për president në Shtetet e Bashkuara të Amerikës, Joe Biden, ka akuzuar presidentin aktual Donald Trump se është “dorëzuar” para pandemisë dhe po dështon të rrijë i përgatitur për një valë të re që mund të rrezikojë rimëkëmbjen ekonomike.

“Populli amerikan ka sakrifikuar shumë për të luftuar këtë virus… mund të humbim progresin që kemi nisur ta bëjmë. Krejt kjo sepse ai ka humbur interesimin. Tani është i dorëzuar në këtë betejë”, ka thënë Biden.

Trumpi është shprehur i vendosur të rihapë ekonominë dhe të vazhdojë kampanjën politike, edhe pse numri i rasteve të reja ka nisur të rritet sërish, me një rekord rastesh të paraqitura në disa shtete këtë javë.

Presidenti planifikon të nisë kampanjën për herë të parë që kur njerëzit ishin detyruar të izoloheshin tre muaj më parë.

“Ai është aq i vendosur që t’i kthehet kampanjës sa që po i vë në rrezik njerëzit”, ka vazhduar Biden.