Fauci: SHBA mund të përballet me 100 mijë infeksione në ditë

Eksperti më i lartë amerikan për sëmundjet infektive, Anthony Fauci, u shpreh i shqetësuar lidhur me rritjen e fundit të rasteve të reja me koronavirus, veçanërisht në shtetet në jug të vendit.

Gjatë një takimi të organizuar në formën e një telekonference nga Dhoma amerikane e Tregtisë, Fauci tha se situata paraqitet e vështirë.

Ai tha se ka ardhur koha “që të shohim atë që po ndodh dhe nëse mund t’i intensifikojmë masat me qëllim frenimin e koronavirusit”, njofton VoA, përcjell albinfo.ch.

Fauci paralajmëroi se Shtetet e Bashkuara së shpejti mund të përballen me “100 mijë infeksione në ditë, nëse nuk përqafojnë me agresivitet masat e distancimit social, vendosjen e maskave dhe masa të tjera”.

Të premten SHBA raportoi rreth 77 mijë raste të reja nga koronavirusi, rekord global për sa i përket shifrave ditore.

Fauci tha se vendosja e maskave është tejet e rëndësishme për rihapjen sërish të vendit dhe se “të gjithë”, sikurse tha ai, “duhet t’i vendosin ato”.