OBSH tregon a do të ketë mbyllje të kufijve

Mbyllja e kufijve kishte ndodhur në mesin e muajit mars dhe kishte zgjatur deri në mesin e muajit qershor

Mbajtja e kufijve të mbyllur nuk është një strategji e zbatueshme për të luftuar kundër koronavirusit të ri, paralajmëroi sot Organizata Botërore e Shëndetit (OBSH), ndërsa pranoi vështirësinë e të paturit një strategji gjithëpërfshirëse në nivel ndërkombëtar.

“Do të bëhet pothuajse e pamundur për vendet që t’i mbajnë kufijtë e tyre të mbyllur në të ardhmen e afërt”, tha Michael Ryan, kreu i OBSH-së për Situatat e Emergjencës, në një konferencë virtuale për shtyp.

“Mbajtja mbyllur e kufijve ndërkombëtarë nuk është domosdoshmërisht një strategji e vlefshme”, shtoi ai, ndërsa pranoi se secili shtet duhej të merrte parasysh individualisht rreziqet e hapjes së kufijve të tij, transmeton ATSH.

Ryan theksoi, gjithashtu, vështirësinë e të paturit të një politike, që funksionon për të gjithë dhe se natyra e rrezikut përcaktohej nga situatat lokale dhe kombëtare, përcjell albinfo.ch.

---