1394 vizitorë të 3 klubeve të Bernës futen në karantinë

Një person ishte testuar pozitiv për koronavirus, në njërin nga këto klube kështu që Zyra Mjekësore ka mbyllur një bar me vendim të menjëhershëm

Autoritetet e Bernës kanë vendosur në karantinë afër 1400 persona. Bëhet fjalë për vizitorë të tre klubeve në qytetin e Bernës.

Një person më parë ishte testuar pozitiv për koronavirus, në njërin nga këto klube kështu që Zyra Mjekësore Kantonale ka mbyllur një bar me vendim të menjëhershëm, shkruan srf.ch.

Siç njofton Drejtoria e Shëndetësisë, e çështjeve Sociale dhe Integrimit, gjithsej 1394 njerëz janë urdhëruar të futen në karantinë, transmeton albinfo.ch.

Fundjavën e kaluar ata kanë vizituar ndonjërin nga tre klubet e Bernës:  Taxi Bar, Cuba Bar Bern dhe Kapitel Bollwerk.

Me këtë rast vetëm “Cuba bar” preket nga mbyllja e menjëhershme. Të gjithë 1009 njerëzit që frekuentuan atë bar duhet të futen në karantinë për shkak të një liste të pasaktë të të ftuarve.

288 vizitorë janë prekur në lokalin “Taxi Bar” dhe 97 persona në “Kapitel Bollwerk”, përcjell albinfo.ch. Në rastin e këtyre dy klubeve, preken vetëm njerëzit që kanë qenë në to nga mesnata e së dielës në mëngjes.

---